Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Una sierra (prenunciau /'sjera/ u /'sjara/; de lo latín <SERRA) ye una sola y extensa formación feita de monts u montanyas tansament deseparadas d'entre ellas, con u sin puntas, estreitament relacionadas por a suya posición, dirección, formación y antigüedat. O termin «sierra» puede fer referencia a formacions que faigan parte d'una cordelera u formación montanyesa superior, u per contra, identificar a cordelera mesma.
L'oronimo sierra deriva d'o latín SĔRRA, y tiene formas equivalents en galaicoportugués, astur-leyonés, castellano, mozarabe, catalán y occitán.
Tamién se documenta en o dominio lingüistico de l'aragonés a palabra sarra, que ha gosau tener cualque difusión en os textos publicaus en as zaguers decadas por personas y colectivos de defensa de l'aragonés. Manimenos, por a suya morfolochía no diftongadera, bels autors millor relacionaus con as variants patrimonials d'a luenga aragonesa l'han sinyalau como forma posiblement arcaica (lat. SERRA > sarra) y actualment no present en as parlas vivas, que en Aragón gosa manifestar-se-ie solament como forma fosilizada en a toponimia.
A forma deminutiva natural d'a palabra sierra, en aragonés, ye «serreta», anque bel autor l'han documentau tamién como «sierreta». O termin «sarrato», relacionau, puede considerar-se morfolochicament una forma deminutiva de l'arcaísmo «sarra» y gosa designar tanto una sierra de dimensions menors (que sería o significau mes apropiau) como una estructura lateral (propiament, una garra u un cerro), que en naixendo d'una sierra gose adquirir cualque identidat morfolochica.
A palabra sierra forma con frecuencia derivaus per afixación, deixando tota una una man de formas composadas con prefixos en a toponimia menor de muitas comarcas d'Aragón, mes que mes en as tierras montanyesas: Susierra/ Sosierra (sub + serra, «debaixo d'a sierra»), Trasierra (trans + serra, «per l'altra man d'a sierra»), etc.